مسطرة الإفراغ السكني ( شرح مبسط جدا)

 

مسطرة الإفراغ السكني ( شرح مبسط جدا) 

هام_للمواطنين  ⚠⚠

عزيزي المواطن أكريت محلا لديك سواءا للسكن أو الاستعمال المهني ، وأردت إفراغه يوما ما ، يجب أن تعلم ان الأمر  لم يعد سهلا عليك وإنما يجب احترام مجموعة من الضوابط والإجراءات والتي قمت بتبسيطها لك كالآتي : 

⛔مسطرة_الإفراغ : ⛔

✔ - اول حاجة بالنسبة نالمكري ميمكنش يخرج المكتري من كراتو إلا بعد إشعاره بذلك ، إما عن طريق مفوض قضائي او بإحدى وسائل التبليغ المنصوص عليهوم فالمادة 37 من ق. م. م. 

✔ - هاد الإشعار خص يكون فيه هاد المعلومات ضروري ولا ميتقبلكش و يكون باطل ولي هي : 

1 _الأسباب ليخالاتك انك تطلب انك تخرجو ، يعني ماشي قالالك راسك وصافي ، و هاد الاسباب راه محددة فالقانون من بعد و نهضرو فيها حيت مهمة بزاف. 

2 _خص يتضمن الاشعار وصف للمحل و المرافق ليفيه. 

3 _ أجل د "شهرين" على الأقل كتعطيها نالمكتري باش يخرجلك من الكراء و ليكتبدا ابتداءا من تاريخ توصل المكتري بالاشعار. 

⛔الأسباب_المبررة_للإفراغ : ⛔

✔ - دابا عنهضرو على واحد المقتضى لي مهم بزاف و كيتعلق "بالأسباب" ليمكلك تستاند عليها في حالة مبغيتي دير هاد الإفراغ و ليمحددها القانون مسبقا : 

السبب_الأول : ⚠⚠

✔- هو انك بغيتي تدير هاد الإفراغ  باش تسكن فيه نتا او و مراتك او والديك او ولادك ، او احفاذك اذا كانو مستفدين من الوصية الواجبة او ليمتكفل بيهوم  ، غا هو خصكوم تردو البال ⛔ هاد السبب القانون ربطو بواحد الشروط أخرى باش يكون سبب جدي ومقبول و لي هي : 

- انك تكون مالك نداك المحل لمدة عل الاقل تكون أكثر من عام و نص  

- ان دوك الناس ليدكرنا لفوق ميكونش عندهوم dejà شي محل فين يسكنو و فالملك ديالوم  .

✔ - غير انه فهاد الصدد مثلا إذا المكري لقا شي محل آخر للمكتري و كان صالح للسكنى و بنفس الثمن ليكان كيخلصو فيه فا فهاد الحالة كيتعفا من دوك 2 د الشروط  

السبب_الثاني : ⚠⚠

✔ - هو أنه يبرر الافراغ دهاد المكتري بكونه عيهدم داك المحل د الكراء و عيدخل إصلاحات عليه  و ليكتستوجب الافراغ ديال المكتري ، غير هو هاد السبب هو بيدو محدد بشروط بحيت هاد الهدم خص يكون الغرض منو اما مثلا ترميم و اصلاح المحل لأنه مهدد بالسقوط او ان المكري بغا يبني شي محل او شي بناء عيعود عليه بالنفع  .

✔ - غا هو فهاد الحالة المكري خصو يخبر المكتري بمجرد يشد الرخصة د البناء انه يخرجلو من دارو في اجل 15 يوم ، و فهاد الصدد مورا ميصلاح المكري كراتو وبغا يكريه من جديد فالمكتري عندو الاسبقية انه يرجع لكراتو . 

السبب_الثالث : ⚠⚠

✔ - هو التماطل في الأداء د الكراء  وهذا المسطرة ديالو كنت شرحتها فالمنشورات السابقة. 

⛔حالة_رفض_تنفيد_الإشعار_بالإفراغ : ⛔

✔ - واحد المقتضى آخر مهم هو أنه إذا رفض المكتري انه يخرجلك من الكراء من بعد مصاردتيلو الاشعار ، و فات الأجل ليحددتيهلو فيه ، فهنا يمكلك تمشي نيشان المحكمة و عتحكملك بالآفراغ.  

⛔#حالة_تنفيد_الإشعار : ⛔

✔ - اذا التزم المكتري بمقتضيات داك الاشعار و خرج بحالو فهنا المكري ملزم انه يعوضو بمبلغ يعادل وجيبة "سنة" من الكراء انطلاقا من آخر وجيبة خلصها فمثلا كان الكراء ب 1000 درهم و المكتري التزم بالاشعار وخرج بحالو فراه كيستافد من تعويض يساوي 12000 درهم  .

⛔أسباب_أخرى_لطلب_الإفراغ : ⛔

✔ - للتخفيف من حدة المقتضيات ليفوق المشرع حدد أسباب اخرى ليمكلك طلب من المحكمة الافراغ د المكتري و بلا متعملو الإشعار و لي هي : 

✔- الحالة ليكيدير المكتري شي حوايج فالمحل غير داكشي ليتفاق معاه فلول.  اولا كيدير شي حاجة فيه مخلة للحياء و النظام العام.  

✔- اذا دار المكتري شي اصلاحات على المحل بلا مياخد الموافقة د المكري .

✔- إهمال المكتري لمحل د الكراء بشكل كيضر به .

✔- عدم أداء واجب الكراء رغم توصله بإنذار الأداء 

... إنتهى....

👈قراءة ممتعة 👉