سبع نصائح لمؤمني CNOPS و CNSS

سبع نصائح لمؤمني CNOPS و CNSS

اليوم بغيت نشارك معاكم بعض النصائح لمؤمني CNOPS و CNSS

وبالخصوص الملتحقين حديثا بالوظيفة العمومية وكذلك الفئات الجديدة لي بدات تاتستافد من الحماية الإجتماعية

لي باقيين ماعارفينش بزاف ديال المعلومات وممكن يوقعو في بعض الأخطاء و موضوع اليوم في هذا الخصوص لتفادي هاته الأخطاء

وباش مايكونوش هاد النصائح عشوائيين غادي نبداو من الزيارة ديال الطبيب إلى تلقي التعويضات مرورا بطبيعة الحال بمرحلة إيداع الملف

مرحلة زيارة الطبيب:

النصيحة رقم 1: أوراق العلاجات

واحد الخطأ لي ديما تانوقع فيه أنا شخصيا و مابغيتكمش توقعو فيه

ديما هزو معاكم أوراق العلاجات معاكم فاش تكونو غاديين عند شي طبيب خصوصا إلى كنتو غادي تمشيو عند شي طبيب فالسبيطار

لأنه في الغالب غادي يخرج ليك شي دواء أو تحاليل ديرهم

وإذا ماكنتيش هاز معاك أوراق العلاجات غادي تضطر ترجع عندو من بعد باش يعمر ليك

والمشكل لي كاين هو ممكن فاش ترجع ماتلقاش داك الطبيب تلقا النوبة ديال طبيب أخر

اللهم من الأون نهزوهم معانا حتى إذا ماحتاجيناهمش ماخسرنا والو

النصيحة رقم 2: الرقم الوطني الإستدلالي INP

فاش يخرج ليك الطبيب شي دواء أو تحاليل و يعمر ليك ورقة العلاجات تأكد أن الرقم الوطني الإستدلالي لي عمر ليك ديالو ماشي ديال السبيطار

هنا تانتكلم بالخصوص على القطاع العام أما في القطاع الخاص راه الأكثرية عندو INP ديالو

في الغالب فالسبيطارات الأطباء الجدد تايكونو باقي ماطلبوش هاد الرقم و تايعمرو للناس أوراق العلاجات ب INP ديال السبيطار

و INP ديال السبيطار كيف تانعرفو راه مامقبولش و غادي يترفض لينا الملف

لذلك من الأول نسولو الطبيب واش عندو وإلى ماعندوش نشوفو شي طبيب في نفس السبيطار يعمر لينا بلى مانتعدبو نرجعو مرة أخرى (خصوصا الناس لي ساكنين بعيد)

مرحلة إيداع الملف:

النصيحة رقم 3 : التأكد من المعلومات

قبل إيداع الملف نتأكدو من مجموعة من المعلومات واش صحيحة لتفادي يترفض لينا الملف (خصوصا الناس لي تيسيفطو الملفات عبر البريد)

وهاد المعلومات لي لازم نتأكدو منها هي:

1.الرقم الوطني الإستدلالي : واخا يكتب ليك الطبيب INP مافيها باس تتأكد واش فعلا ديالو أو ممكن يكون نسا ماكتبوش ليك و كاينين مواقع باش تتأكد من هاد القضية

2.التوقيع و الطابع : ديال الطبيب و الصيدلي إلى اشترينا شي دواء والمختبر إلى درنا شي تحاليل سواء تحاليل بيلولوجية أو إشعاعية

3.الطابع في الوصفة الطبية : الطابع ديال الصيدلي والمختبر

4.المعلومات الضريبية في الفاتورة : إلى درنا التحاليل ضروري المختبر يعطيك فاتورة تأكد أنه فيها المعلومات الضريبية وبالخصوص IF و ICE لي إلى ماكانوش غادي يترفض ليك الملف

النصيحة رقم 4 : رقم الهاتف

ديما وقتما حطينا شي ملف في التعاضدية نكتبو فيه رقم الهاتف ديالنا باش إلى كانت ناقصة شي حاجة يتاصلو بينا

ممكن تكون ناقصة فقط شي حاجة بسيطة بحال التوقيع ديالك وفي هاد الحالة غادي يتاصلو بيك و تمشي تكملها والملف ديالك غادي يدوز للمرحلة الموالية من التعويض في أيام قليلة

النصيحة رقم 5 : العنوان

تأكد من الموقع أن العنوان لي مكتوب صحيح و محين باش إلى رجع ليك شي ملف يرجع للعنوان لي نتوما ساكنين فيه

و بالنسبة لمنخرطي CNOPS إلى كان عندك شي مرض مزمن و كملات مدة الصلاحية ديالها ممكن تتجدد تلقائيا وغادي توصلك في العنوان لي عاطيهم

و كذلك بالنسبة لمنخرطي CNSS إلى ماكنتوش دافعين رقم الحساب البنكي راه تاتوصلكم في العنوان ديالكم واحد الرسالة فيها واحد الكود لي تاديوه للبنك باش تاخدو التعويضات ديالكم

مرحلة إيداع الملف:

النصيحة رقم 6 : إستخلاص التعويضات

الناس لي مادافعينش رقم الحساب البنكي سواء مؤمني CNOPS أو CNSS فاش تتعوضو فشي ملف سيرو خودو التعويضات ديالكم قبل مرور 60 يوم

لأنه بعد مرور هاد المدة و ماخديتش فلوسكم غادي يرجعو للمصدر ديالهم وغادي يخصكم ديرو طلب من جديد باش يعاودو يسيفطو ليكم الحوالة

و غادي يقطعو ليكم واحد الرسوم إضافية

النصيحة رقم 7 : إعتماد الحساب البنكي

لتفادي المشكل لي قلت في النصيحة رقم 6 و باش فلوسك يوصلوك كاملين بدون إقتطاعات من الأحسن نديرو الحساب البنكي كطريقة لتلقي التعويضات

لذلك وجب عمل تحيين للحساب البنكي و الوثائق المطلوبة فهاد الحالة

بالنسبة لمنخرطي كنوبس :

.شيك ملغى أو شهادة بنكى

.نسخة من بطاقة كنوبس

.نسخة من البطاقة الوطنية